طقوس السبوع

طقوس السبوع

لية كل واحدة من كل بلد ما تقوللناش علي طقوس سبوعهم؟
وبكدة ممكن نقرب الثقافات
ويبقي عندنا معلومات عن طقوس كل الدول
اية رايكم؟
انا هابدا بنفسي
احنا عندنا في مصر طقوس معينة للسبوع
اولا في حاجة اسمها تبييتة
بتكون قبل السبوع بيوم
وبتعمله ست من العيلة
وبعدها بتجيب طبق وتحط فية مية وملح
وتحط في الطبق دةحبات فول ناشفة
ويفضل لتاني يوم يكون الفول باش طبعا من المية
المهم تجيب الست 7 حبات من الفول وتربطهم في خيط
وتربط عليهم 7 عقدات
وتحط فيهم دبوس وتربطه في ملابس اي واحد حضر السبوع
دة اولا
ثانيا بخصوص الام
بيجيبوا بخور ويولعوه ويحطوة في الارض
وتقوم الام وتعدي علية سبع مرات
وبعدين تتلم العيلة ويجيبوا الملح ويرشوه في البيت كلة
ويدخلوا كل شقة في البيت ويرشوا فيها حبة
وعلي السلم وفي كل مكان يوصلوله
وبعدين يتلموا الاطفال ويجيبوا الشمع ويغنوا اغاني المولود
حلقاتك برجلاتك والحوارات دي
وبعدين اهل المولود يفرقوا السبوع علي الاطفال وعلي الجيران
ثالثا السبوع
مكوناتة بتكون اولا فشار
وملبس وحمص وشيكولاتة
وفول سوداني وشمعة وكارت البيبي
وبيحطوه في فانوس كارتون
(زي فانوس رمضان بس كارتون)
وفيه علب صيني
وبيكون شكلها جميل اوي
وكمان علب بلاستيك
ولها اشكال والوان كتيرة
وبتبقي فرحة جميلة جدا عند الاطفال
وذكري حلوة اوي عند الكبار
ممكن تكون فيها كتير من البدعة
بس احنا وعينا عليها كدة
والناس لحد دلوقتي بتعمل كدة
وعاوزة اعرف طقوس السبوع في كل بلد اية
عايزة ردود يا بنات
يلا نشوف سبوعكم عامل ازاي